هات وخد!!! - خواطر شيرين المصري

هات وخد!!! من رحمة ربنا بينا إنه خلق كل إنسان عنده شيء مش موجود عند التاني عشان كلنا نتكاتف ونقدر نعيش، وف التعب نسأل على بعض والفرح نساند بعض والحزن نواسي بعض ...!! لكن من تشديدنا على نفسنا إننا نخلق شيء مُقزز اسمه العادات والتقاليد وبنقدسها أكتر من التزامنا بتعليمات ربنا!! يعني ايه زيارتك لمريض وانك تطلعله مبلغ بنية صافية او تديله هدية، تروح بعدها تطلع بيها عينه وتعتبرها دين عليه!! يعني ايه لما تجامل حد ف فرح أو ف مناسبة تحسبها بالورقة والقلم لأ وفي ناس بتوصل بيهم أنهم يروحوا ويطالبوا بالمبالغ اللي دفعوها!!! ف الأول والآخر مفيش شرع ولا دين بيقول أنك تحسب وقفتك وجدعنتك مع الناس ان اعتبرناها جدعنة يعني دين، اللي بيساعد بحاجة مُفترض يطلعها لوجه الله أنت تقدر تطلع مبلغ لفلان يطلع من ذمتك مش قادر خلاص لكن طالما محدش استلف منك فلوس ملكش انك تطلب الرد، شيء سخيف انك تروح انهاردة تدي فلان 100 جنيه اللي عليها توقيع عم شكشك بتاع البويا لحبيبته سنية جُنح وتاني يوم تلاقيها مردودالك ف تعبك فرق كبييييييير بين المشاعر والتجارة صفوا نفوسكم واعملوا الشيء لله وراعوا بعض في حاجات ينفع فيها هات وخد لكن المشاعر مفيهاش أبداً هات وخد فيها اللي عندي واللي هقدر عليه هعمله واللي أنت حاسه هيكون أعظم بكتير من فلوس أو علبة شوكولاتة والا هدية ملهاش أي 30 لازمة وهتزود العبء أنك لازم تكون مُستعد ف أي وقت يحصل مناسبة لغيرك عشان تردها والا ياكلوا وشك، عاملوا ربنا بلاش أصنام الفكر وعاهات التقاليد تسيطر عليكوا!!! #شيرين_المصري