تأملات 2 - شيرين المصري

على قدر صلابة الحديد، ورقة المياه، ولكنها تجعله يصدأ ويتآكل... هكذا بعض العلاقات في حياتنا ربما يكون من يسبب لنا الأذى النفسي ويقتلنا هو ملاك الرحمة في عيون الآخرين، ولكنهم لم ولن يصدقوا أنه يؤلمنا لأنهم لم يكن معدنهم يوماً الحديد، فلا ترهق نفسك في الشرح والتحليل، فقط ارحل عن كل من يؤذيك!!! #شيرين_المصري

احسبها صح - خواطر شيرين المصري

#احسبها_صح

مرة واحد أهله خدوه ف زيارة يوم كامل عند قرايبهم، من أول ما دخل مكانش مبسوط، فضل يقارن نفسه بابن عمه لاقاه اذكى منه، قال يلعب مع بنت عمه طلعت اللعب اللي عندها مش مناسبة ليه، راح يقعد مع الكبار مفهمش حاجة من كلامهم، قرر يرسم ع الحيطة باباه زعقله، ولما اتحط الأكل كان الأصناف اللي بيحبها بعيد عنه، فضل طول اليوم زعلان لحد لما جه يمشي!!!

السيناريو دة بيتكرر ف حياتنا كلنا بنفضل نقارن نفسنا بناس ونكتئب لو حسينا أنهم أعلى مننا، مبنعرفش نتأقلم لو ملقيناش اللي احنا عاوزينه، مبنحسبهاش صح ونعرف نعمل ايه امتى وازاي، لو الحاجات اللي عاوزينها بعيد عننا مبنبذلش مجهود كفاية عشان نوصلها، بنضيع عمرنا ف تفاهات كان ممكن نتغاضى عنها لو فكرنا اننا مجرد ضيوف وماشيين، وف بيتنا الحقيقي ف الجنة نقدر نعمل اللي احنا عاوزينه!!! #شيرين_المصري

تأملات - خواطر شيرين المصري

#تأملات

تخيل معايا انك عاوز تقص شعرك قصة جديدة، تفتكر هتروح للميكانيكي والا للكوافير؟!!

أكيد مش محتاجة ذكاء يعني في كوافير بتثق فيه هتسلمله راسك وأنت واثق أنك هتطلع بالشكل اللي أنت عاوزه او أحسن!!

مع ان الكوافير دة ممكن يكون أساساً تعبان ف الوقت اللي أنت رايحله ويمسك المقص يخربلك شعرك بس مبتفكرش ف دة يقينك بيغلب شكك!!

ما بال أنت لما تروح لرب الكون اللي خلق ودبر كل شيء من مثال الذرة لما لا نعل، تخيل لما يخلقك ويصيغك ف أحسن صورة وأنت بدون إدراك كافي منك تفضل تقارن وتقول أنا ليه مطلعتش قوي وجسمي كله عضلات زي ترابل اتش، طب أن ليه مش ف ذكاء فلا، اللي وشها كله نمش مخنوقة ونفسها تشيله واللي وشها سليم تجري تعمل نمش او بشرة برونزية، اللي عنده المال بيتمنى يعيش حياة بسيطة واللي معندوش هيموت ويكون غني!!

حياتنا كلها صراعات محدش راضي يقتنع إن اللي هو فيه أنسب شيء فعلاً ليه، عاملين زي اللي داخل لجنة امتحان عمال يفكر أي نوع برفان يستخدم ويلبس أي جزمة وف النهاية أصلاً محدش هيشم برفانه ولا يفكر ف جزمته الوقت هينتهي والورقة هتتسحب، ياريت نفكر بجد ف حل الاسئلة بدل ما نفكر ف شكلنا ومعانا ايه واحنا داخلين الامتحان، خلص الكلام!!! #شيرين_المصري

خليكي نفسك - خواطر شيرين المصري

#خليكي_نفسك

حلوة أوي عين صاحبتك الخضراء، بس تعرفي لما حطيتي لينسس عشان تبقي زيها بقيتي عاملة زي اللي مركبة كشافات ف عنيها!!!

جميلة أوي جيبة أختك الصغيرة بس عارفة لما عملتي زيها بقيتي شبه الهنود الحمر!!!

بحب بشرة جارتك البرونزية بس لما أنتي عملتيها بقيتي شبه البواب!!!

رائع الأثاث السينيه اللي عند قريبتك، بس أنتي لما جبتيه خدتي قرض من البنك ومش هتعرفي تسدديه!!!

بإختصار أنتي جميلة زي ما أنتي بلونك بضحتك بلبسك بحاجاتك كلها مش محتاجة تقلدي فلانة عشان تبقي حلوة أو تاخدي ستايل علانة عشان تبقي أنيقة، مش محتاجة تبصي على غيرك جابو ايه وتجري تقلدي وخلاص ... مش كل حاجة حلوة ينفع تكون لينا ولا كل حاجة جميلة بتكون لايقة علينا، احنا اللي بندي للحاجة معنى و احنا اللي بندي للحياة البهجة، وزنك ف الحياة مش شكلك والا فلوسك ولا تعليمك ... وزنك الحقيقي هو البصمة اللي هتسيبيها للي بعدك، خليها بصمتك أنتي مش بصمة حد غيرك!!! #شيرين_المصري

مش كل اللي شايفه حقيقة - خواطر شيرين المصري

#مش_كل_اللي_شايفه_حقيقة

تخيل معايا نموذج فلان وعلان ف موقف بسيط

فلان روحتله زيارة رحب بيك وادالك اوضة تبيت معاه كام يوم، طول اليوم ضحك وهزار معاك وآخر روقان، سايبلك لا توب الجمينج تلعب براحتك بيقدملك وليمة ف كل معاد أكل وطاير بيك.

علان روحتلك بردو زيارة كان بيته مش نضيف، جه وقت العشاء قدملك طبق فول ومرضيش ياكل معاك، كلامه كان قليل جداً كأنه مش مبسوط أصلاً أنه شافك، وفجأة وأنت بتتكلم معاه نام وسابك تحكي للهوا...

للوهلة الأولى فلان شخص كريم ورحب بيك على أكمل وجه، وعلان شخص بخيل قتم ومينفعش تزوره تاني!!!

بس الحقيقة: فلان قاعد يحكي ورهزر طول اليوم عشان معندوش حاجة مهمة يعملها، أتولد وف بقه معلقة ذهب سايبلك لاب توب هو أصلا هيرميه ويجيب واحد جديد والأكل اللي بيقتدملك كل يوم هو دة الطبيعي اللي الطباخ بيعمله كل يوم مفيش حاجة معمولة عشان خاطرك.

علان: عنده مجموعة امراض صارف عليها مرتبه ومش لاقي ياكل، هو مش شخص مقرف بس بجد من كتر وجع عظمه مش قادر ينضف بيته، علان مرضيش ياكل معاك عشان دة كان آخر أكل عنده حب يسيبه ليك أنت بنفس راضية، كان بيتكلم قليل عشان تعبان مش قادر أصلاً هو بيقاوم عشان ميبانش قدامك ضعيف ومتعرفش انه تعبان، سابك ونام مش قلة ذوق منه بس الأدوية بتاعته فيها نسبة مخدر عالية.

فلان أدالك اللاب توب اللي هيترمي لو انت مستخدمتهوش والأكل اللي كلته كان بيترمي كل يوم عشان محدش بياكله باختصار معملش عشانك أي حاجة ... علان مكانش ف بيته غير طبق الفول وقدمهولك ونام هو جعان!!!

النظرة السطحية بتظلم ناس كتيير اوعى المظاهر تخدعك دة حجات كتير ميعلمهاش غير رب العباد!!! #شيرين_المصري